Taupak martiaren 15ean ireki dau norbanakoek Euskaraldian izena emoteko epea. Egitasmoaren laugarren edizinoa maiatzaren 15etik 25era egingo da. Euskaraldia euskeraren erabilera aktibatzeko mugimendua da, edo beste era batera esanda, euskera gehiago erabilteko ariketa praktikoa. Irati Iciar Taupako lehendakariak dinoen moduan, “urte askotan euskararen ezagutzan jarri da foko nagusia eta premiazkoa da erabilera sustatuko duen paradigma berri bat bultzatzea. Gaur gaurkoz Euskaraldia da helburu hori lortzeko dugun tresna eraginkor eta masiboena”.
» Zertan datza ariketak?
Euskaraldiak irauten dauzen hamaka egunetan, parte-hartzaileek euskeraz biziko dira. Rol bi hautu daitekez: AHOBIZI eta BELARRIPREST. AHOBIZI rola hartzen dabenek euskeraz ulertzen daben guztiekaz euskeraz egingo dabe uneoro. Eta ezezagunekaz lehenengo berba euskeraz izango da. Bestalde, BELARRIPREST rola haututzen dabenek, euskera entzuteko prest egongo dira. Bai batzuk bai besteek euren rola adierazten dauen txapa bat eroango dabe.
Euskaraldiko lantaldearen ustetan txapa soinean erabiltea ezinbestekoa da, “estres linguistikoa” ezabatzen dauelako. Hizkuntzalarien arabera, estres linguistikoa da pertsona elebidun batek, ezezagunen aurrean, hizkuntza gitxiagotua hobesteak ekartzen deutson tentsinoa. Txapa ikusita bai baitakigu aurrean daukagunak euskeraz ulertzen dauela, behinik behin. Holan, txapak mezu argia emoten deutso aurreran daukanari “nigaz egizu euskeraz!”.
» Zelan emon daiteke izena?
Euskaraldian parte hartzeko ezinbestekoa da izena emotea. Honetarako, Taupak esteka bat abiarazi dau euren webgunean izena emoteko: https://izenematea.euskaraldia.eus. QR kodea bere sortu dabe izena errazago emoteko. Ganera, izena eskuz bere emon daiteke Kultur Etxean. Behin izena emonda, txapa Gatikako Kultur Etxean eskuratu beharko dabe parte hartzaileek.
Informazino gehiago: https://euskaraldia.eus